Starfsemin

Samtökin voru stofnuð til varnar hagsmunum lántakenda og íslenskra heimila eftir gjaldþrot þriggja einkarekinna banka. Umræða um hagsmuni heimilanna á fjármálamarkaði var og er brýn.  

Samtökin hafa lengi verið eini óháði ráðgefandi aðilinn á fjármálamarkaði en samtökin veita félagsmönnum sínum lögfræðilega ráðgjöf um réttindi sín og aðstoða eins og unnt er við málarekstur til að ná fram þeim réttindum og verja þau.

Afstaða samtakanna er sú að neytendur/lántakendur eigi ekki að vera háðir ráðgjöf eða afstöðu fjármálafyrirtækja í viðskiptum sínum enda eru þau ekki hlutlaus í þeirri afstöðu. Það er nauðsynlegt að óháð ráðgjöf sé öllum aðgengileg. Viðskipti heimilanna á fjármálamarkaði eru einn stærsti útgjaldaliður þeirra og gríðarlega mikilvæg fyrir heimilin, hagkerfið allt og lífskjör landans. 

Neytendatorg er nýr í liður í starfsemi samtakanna. Undirliggjandi markmið þess er að miðla þekkingu af vettvangi samtakanna út í samfélagið með gagnlegum hætti fyrir íslensk heimili. 

Stjórn samtakanna heldur úti umræðuvef á FB (Facebook) undir nafni samtakanna og hvetur félagsmenn og aðra til þátttöku í umræðu um verkefni stjórnar eða önnur samfélagsmál. Hópurinn er lokaður og því þarf að óska eftir aðgangi, sem að jafnaði er veittur þeim sem sækir um.   Samtökin reka einnig FB síðu undir yfirskrift nýrrar vefsíðu samtakanna - Neytendatorg Hagsmunasamtaka heimilanna - þar sem fréttatilkynningar og fleira efni frá samtökunum verður deilt og er opið öllum. Við hvetjum félagsmenn og aðra gesti að koma með tillögur eða athugasemdir því markmiðið með Neytendatorgi HH er að veita sem besta upplýsingagjöf fyrir íslensk heimili.

 Samtökin eru rekin á árgjaldi félagsmanna sem eru og hafa frá stofnun samtakanna verið valkvæð. Í valkvæðu árgjaldi felst að félagsmanni ber ekki skylda til þess að greiða það til að halda áfram aðild að samtökunum. Félagsmaður getur því falið greiðsluseðil í heimabanka þar til hann/hún hefur kost á því að styðja við samtökin.   Reglulega leita samtökin eftir fjárhagslegum stuðningi eða styrkjum hjá því opinbera eða stéttarfélögum en því miður hafa samtökin aldrei átt greiða leið að fjárhagslegum stuðningi, þrátt fyrir mikilvægt starf. Stjórnarmenn vonast til að það muni breytast með vitundarvakningu um mikilvægi þess að efla neytendarétt á fjármálamarkaði.   Hjá félaginu starfa tveir starfsmenn í hlutastarfi og báðir vinna að verkefnum  stjórnar ásamt því að sinna daglegum rekstri félagasamtakanna.
Stjórn samtakanna fundar að jafnaði einu sinni í viku um málefni félagsmanna og önnur hagsmunamál heimilanna. Stjórnarmenn eru sjálfboðaliðar og starfa að hugsjón við hagsmunamál heimilanna.   Starf stjórnar er þverpólitískt en í því felst að stjórnarmenn koma úr ýmsum áttum en eiga það sameiginlegt að tala fyrir hagsmunum heimilanna með því að bæta kjör og réttindi lánþega á fjármálamarkaði.
Félagsmenn eru tæplega níu þúsund og hafa lengst af verið á milli átta og níuþúsund einstaklingar. Síðustu ár hafa samtökin boðið félagsmönnum reglulega uppá opna spjallfundi með fulltrúum stjórnar. Samtökin hafa einnig staðið fyrir félagsfundum og borgarafundum þegar stjórn telur þörf á.   Við hvetjum félagsmenn til þáttöku í starfi samtakanna og eru opnir spjallfundir og aðalfundur HH greiður aðgangur fyrir félagsmenn. Aðalfundur er haldinn snemma árs eða fyrir febrúarlok ár hvert.

Lögfræðingur Hagsmunasamtaka heimilanna veitir félagsmönnum einstaklingsráðgjöf. Félagsmenn geta hringt á skrifstofuna á símatíma (10-13 mánudaga og þriðjudaga) og óskað eftir ráðgjöf eða sent tölvupóst á heimilin@heimilin.is, alla virka daga. 

Á Neytendatorgi Hagsmunasamtaka heimilanna verður hægt að finna ýmsar hagnýtar upplýsingar um réttindi og skyldur í viðskiptum lánþega, efnisflokkur sem smám saman mun verða viðameiri.

Aðalstjórn HH 2019-2020: Ásthildur Lóa Þórsdóttir, Einar Valur Ingimundarson, Guðrún B. Harðardóttir, Guðrún Indriðadóttir, Hafþór Ólafsson, Róbert Þ Bender, Vilhjálmur Bjarnason.

Varastjórn HH 2019-2020: Sigríður Örlygsdóttir, Björn Kristján Arnarson, Þórarinn Einarsson, Ragnar Unnarsson, Sigurbjörn Vopni Björnsson, Stefán Stefánsson.

Stefnuskrá:

  1. Barátta gegn verðtryggingu lána heimilanna.
  2. Leiðréttingar á verðtryggðum og gengistryggðum lánum heimilanna til samræmis við neytendarétt.
  3. Barátta gegn mannréttindabrotum í málsmeðferð skuldamála heimilanna.
  4. Rannsókn á aðgerðum sem ráðist var í eftir hrun og afleiðingum þeirra fyrir heimilin.
  5. Fundið verði hvað kostar að lifa hófsömu mannsæmandi lífi og framfærsla verði tryggð til samræmis við það.

© Hannað af Filmís 

Hagsmunasamtök heimilanna voru stofnuð 15. janúar 2009 og eru frjáls og óháð hagsmunasamtök á neytendasviði, til varnar og hagsbóta fyrir heimilin í landinu.

Orð frá formanni

CEO 

Orð frá formanni Varlega áætlað hafa 15.000 fjölskyldur, 45.000 einstaklingar misst heimili sín frá hruni. Enginn hefur svarað fyrir það, hvað þá axlað á því ábyrgð. 

Þegar 15% þjóðarinnar missa heimili sín, gætir áhrifanna víða. Við sjáum þau í ástandinu á leigumarkaði og við sjáum þau líka í auknum kvíða meðal ungmenna og kulnun hjá þeim sem eldri eru.

Þegar fólk er svipt heimilum sínum glatar það öryggi sínu sínu og fótfestu. Þegar við bætist magnvana reiði og örvænting vegna óréttlætisins sem það stendur frammi fyrir ásamt hjálpar- og varnaleysinu sem það upplifir þegar heimilinu er hreinlega stolið af því, er ekki nema von að eitthvað láti undan.

Spillingin í þjóðfélaginu er djúp og hún á sér margar hliðar. Hún birtist ekki bara í háu húsnæðisverði og skelfilegum leigumarkaði eða háum vöxtum og verðtryggingu, hún birtist ekki bara í því hvernig lífeyrissjóðirnir misfara með fé okkar allra eða í „krónu á móti krónu“ skerðingu, hún birtist ekki bara í lágum launum verkafólks á meðan sjálftökufólk af ýmsum toga skammtar sjálfu sér milljónir, hún birtist ekki bara í spilltum dómstólum sem gæta hagsmuna „hinna sterku“ í dómum sínum eða í því hvernig lög- og stjórnaskrárvarin réttindi hafa verið brotin á neytendum frá hruni með skelfilegum afleiðingum.

Nei, hún birtist í þessu öllu og meiru til. Spillingin er djúp og teygir anga sína víða. Hana þarf að rífa upp með rótum til að hægt sé að byggja upp nýtt og betra þjóðfélag.

Fyrsta skrefið væri að að afnema verðtryggingu á lánum heimilanna! Öðruvísi er ekki hægt að skapa eðlilegan húsnæðismarkað eða stöðva sjálftöku fjármálastofnanna á tekjum fólks.

En til að takast á við ræturnar þarf að fara fram rannsókn á aðgerðum stjórnvalda eftir hrun. Jú það var líka spilling fyrir hrun, en þá urðu ákveðin vatnaskil og það var þá sem meðvituð ákvörðun var tekin um að fórna heimilum landsins fyrir bankana.

15.000 heimili eiga skilið að fá svör og uppreist æru.

Við biðjum ykkur um að styðja kröfuna um Rannsóknarskýrslu heimilanna!

Ásthildur Lóa Þórsdóttir
Formaður HH

Fylgstu með á samfélagsmiðlum