Fréttir

Stjórnarskrárfrumvarp forsætisráðherra

Stjórnarskrárfrumvarp forsætisráðherra

Umsögn

Hagsmunasamtök heimilanna sendu í gær umsögn um stjórnarskrárfrumvarp forsætisráðherra inn í samráðsgátt stjórnvalda.

Í umsögninni er fjallað efnislega um þær breytingar sem forsætisráðherra leggur til að verði gerðar á stjórnarskrá Íslenska lýðveldisins.

Við hvetjum félagsmenn til þess að lesa umsögnina, en hún er þar meðal rúmlega tvöhundruð umsagna, flestra frá einstaklingum.

Breytingar á stjórnarskránni

Hagsmunasamtök heimilanna hafa hingað til ekki blandað sér í umræðuna um nýja stjórnaskrá. Að því sögðu hafa samtökin, eftir að hafa tekist á við stjórnkerfið og dómskerfið frá hruni og upplifað spillinguna innan þess frá fyrstu hendi, rekið sig illilega á vald embættismanna sem enginn virðist ráða við og bera enga ábyrgð gagnvart neinum, allra síst kjósendum. 

Þessu þarf að breyta og þó það verði ekki gert í einu skrefi eða með þessari umsögn, þá er þetta útgangspunktur samtakanna gagnvart stjórnarskrárbreytingum. Barátta samtakanna hefur alltaf snúist um að það eigi að fara eftir stjórnarskránni og öðrum lögum. Á meðan það er ekki gert er lítill tilgangur með nýrri stjórnarskrá.

Samtökin benda á að hefðu lög og stjórnarskrárvarin réttindi einstaklinga verið virt í aðgerðum stjórnvalda eftir hrun, sem og af dómstólum, hefðu þúsundir fjölskyldna ekki þurft að missa heimili sín. Að stjórnarskrárvarin mannréttindi hafi verið brotin á þúsundum fjölskyldna eftir hrun, til að bjarga fjármálakerfinu, er staðreynd sem stjórnvöld vilja ekki horfast í augu við, hvað þá leiðrétta. 

Þrátt fyrir ítarlega og efnislega umsögn samtakanna um þetta stjórnarskrárfrumvarp, er afstaða okkar fyrst og fremst sú að takmörkuð þörf sé á nýrri stjórnarskrá, á meðan ekki er farið eftir mannréttindarákvæðum gildandi stjórnarskrár í þeim tilvikum sem það gæti komið sér illa fyrir fjármálaöflin.

Áður en breytingar verða gerðar á stjórnarskrá, þarf að grandskoða og gera upp brotin á gildandi stjórnarskrá með RANNSÓKNARSKÝRSLU HEIMILANNA.


© Hannað af Filmís 

Hagsmunasamtök heimilanna voru stofnuð 15. janúar 2009 og eru frjáls og óháð hagsmunasamtök á neytendasviði, til varnar og hagsbóta fyrir heimilin í landinu.

Orð frá formanni

CEO 

Orð frá formanni Varlega áætlað hafa 15.000 fjölskyldur, 45.000 einstaklingar misst heimili sín frá hruni. Enginn hefur svarað fyrir það, hvað þá axlað á því ábyrgð. 

Þegar 15% þjóðarinnar missa heimili sín, gætir áhrifanna víða. Við sjáum þau í ástandinu á leigumarkaði og við sjáum þau líka í auknum kvíða meðal ungmenna og kulnun hjá þeim sem eldri eru.

Þegar fólk er svipt heimilum sínum glatar það öryggi sínu sínu og fótfestu. Þegar við bætist magnvana reiði og örvænting vegna óréttlætisins sem það stendur frammi fyrir ásamt hjálpar- og varnaleysinu sem það upplifir þegar heimilinu er hreinlega stolið af því, er ekki nema von að eitthvað láti undan.

Spillingin í þjóðfélaginu er djúp og hún á sér margar hliðar. Hún birtist ekki bara í háu húsnæðisverði og skelfilegum leigumarkaði eða háum vöxtum og verðtryggingu, hún birtist ekki bara í því hvernig lífeyrissjóðirnir misfara með fé okkar allra eða í „krónu á móti krónu“ skerðingu, hún birtist ekki bara í lágum launum verkafólks á meðan sjálftökufólk af ýmsum toga skammtar sjálfu sér milljónir, hún birtist ekki bara í spilltum dómstólum sem gæta hagsmuna „hinna sterku“ í dómum sínum eða í því hvernig lög- og stjórnaskrárvarin réttindi hafa verið brotin á neytendum frá hruni með skelfilegum afleiðingum.

Nei, hún birtist í þessu öllu og meiru til. Spillingin er djúp og teygir anga sína víða. Hana þarf að rífa upp með rótum til að hægt sé að byggja upp nýtt og betra þjóðfélag.

Fyrsta skrefið væri að að afnema verðtryggingu á lánum heimilanna! Öðruvísi er ekki hægt að skapa eðlilegan húsnæðismarkað eða stöðva sjálftöku fjármálastofnanna á tekjum fólks.

En til að takast á við ræturnar þarf að fara fram rannsókn á aðgerðum stjórnvalda eftir hrun. Jú það var líka spilling fyrir hrun, en þá urðu ákveðin vatnaskil og það var þá sem meðvituð ákvörðun var tekin um að fórna heimilum landsins fyrir bankana.

15.000 heimili eiga skilið að fá svör og uppreist æru.

Við biðjum ykkur um að styðja kröfuna um Rannsóknarskýrslu heimilanna!

Ásthildur Lóa Þórsdóttir
Formaður HH

Fylgstu með á samfélagsmiðlum