Á döfinni

Fá heimilin að njóta vafans?

Fá heimilin að njóta vafans?

Stjórn Hagsmunasamtaka heimilanna vill að þak verði sett á vísitölu neysluverðs við útreikning á verðtryggðum lánum, nú þegar djúp efnahagslægð er í aðsigi. Umfang og áhrif hennar eru óljós.

Íslensk heimili þurfa því fullvissu um að greiðslubyrði verðtryggðra lána haldist í hendur við þau verðbólgumarkmið

sem Seðlabankinn setur sér. Það er sanngjörn og eðlileg krafa. Það dugar skammt að verja heimilin fyrir tekjutapi, ef ekki á einnig að verja þau fyrir stökkbreytingu á greiðslubyrði verðtryggðra lána. Huga þarf að heildarmyndinni og skoða hana í ljósi sögunnar.

Stóra spurningin um aðgerðir ríkisstjórnarinnar núna hlýtur því að vera hvort heimilin fái að njóta vafans?

 

 

Á döfinni

Formaður HH var í viðtali á Bylgjunni í vikunni um kröfur samtakanna og til umræðu um nýlega aðsenda grein hennar á visir.is: Alveg eins og var gert eftir hrun. Félagsmenn og aðrir gestir Neytendatorgs Hagsmunasamtaka heimilanna geta hlustað á viðtalið hér: Bítið - Ásthildur Lóa Þórsdóttir. Stjórn HH vinnur nú að því að tala máli sinna félagsmanna og kallar eftir aðgerðum til varnar heimilunum í viðjum verðtryggra lána á tímum heimsfaraldurs.

 

Stjórn samtakanna leggur áherslu á þrennt:
1.    Að þak verði sett á verðtryggingu lána heimilanna
2.   Tryggt verði að enginn missi heimili sitt vegna Covid-19
3.   Stytting fyrningartíma eftir árangurslaust fjárnám

 

Nú fylgjumst við grannt með og vonumst til að ráðamenn taki ákvarðanir í ljósi sögunnar. Katrín Jakobsdóttir, forsætisráðherra sat fyrir svörum í umræðuþætti RÚV um Covid-19 og stöðu heimilanna, 31. mars síðastliðinn. Í þættinum lögðu tveir þáttastjórnendur aðsendar spurningar fyrir forsætisráðherra. Ljóst er að efnahagslegar áhyggjur fólks eru miklar og full ástæða fyrir umræðuþætti sem þessum. Hagsmunasamtök heimilanna sendu inn spurningar í þáttinn um tvö helstu áhersluatriði samtakanna á þessum tímum. 

Forsætisráðherra var spurður um hvort það kæmi til greina að setja þak á verðtryggingu lána en hún vék sér undan því að svara þeirri spurningu. Forsætisráðherra var einnig spurður hvort kæmi til greina að stöðva aðfarir og nauðungarsölur til að tryggja að fólk missi ekki heimili sín vegna þeirra aðstæðna sem eru í samfélaginu. Svar ráðherrans var á þann veg að það verði tekið til skoðunar eins og gert var eftir hrun. Svar Katrínar Jakobsdóttur er óskiljanlegt í ljósi reynslunnar.

Afneitun er óneitanlega öflugt vopn, en staðreyndin er sú að með þessu svari hafnar leiðtogi þjóðarinnar því sem er reynsla þúsunda Íslendinga og ráðandi orðræða á vettvangi Hagsmunasamtaka heimilanna um kerfislægan yfirgang fjármálafyrirtækja á venjulegu fólki og eigum þeirra, eftir hrun. Félagsmenn Hagsmunasamtaka heimilanna eru á níunda þúsund og bitur reynsla fjölmargra knýr baráttu samtakanna áfram. Það er önnur saga af hruninu en sú sem hefur verið haldið á lofti síðastliðinn áratug. Söguskýring sem ráðamenn virðast ekki vilja horfast í augu við því hún varpar skugga á efnahagslegan viðsnúning sem hefur verið metinn kraftaverki líkastur. Því kemur það ekki á óvart að forsætisráðherra víki sér undan því að svara mikilvægum spurningum og ákalli fjölmargra, með skýrum og afdráttarlausum hætti. Spurningu sem hún þó viðurkennir að fá ítrekað og oftast. Við verðum að vonast eftir viðsnúningi og að ríkisstjórnin muni móta lausnir sem taka mið af biturri reynslu og áhyggjum margra. Við vonumst því að heimilunum verði leyft að njóta vafans.

Viðbrögð og svör forsætisráðherra í fyrrnefndum þætti, urðu einmitt kveikja að greinarskrifum formanns Hagsmunasamtaka heimilanna sem lesa má nú á visi.is: Alveg eins og var gert eftir hrun. Aðsendar greinar Ásthildar á Vísi fá að jafnaði mikla athygli og eiga tryggan lesendahóp. Við hvetjum félagsmenn til að fylgjast með umræðunni á facebook síðu samtakanna og taka þátt. Samstaðan er okkar vopn!

Með kveðju frá stjórn Hagsmunasamtaka heimilanna

 


© Hannað af Filmís 

Hagsmunasamtök heimilanna voru stofnuð 15. janúar 2009 og eru frjáls og óháð hagsmunasamtök á neytendasviði, til varnar og hagsbóta fyrir heimilin í landinu.

Orð frá formanni

CEO 

Orð frá formanni Varlega áætlað hafa 15.000 fjölskyldur, 45.000 einstaklingar misst heimili sín frá hruni. Enginn hefur svarað fyrir það, hvað þá axlað á því ábyrgð. 

Þegar 15% þjóðarinnar missa heimili sín, gætir áhrifanna víða. Við sjáum þau í ástandinu á leigumarkaði og við sjáum þau líka í auknum kvíða meðal ungmenna og kulnun hjá þeim sem eldri eru.

Þegar fólk er svipt heimilum sínum glatar það öryggi sínu sínu og fótfestu. Þegar við bætist magnvana reiði og örvænting vegna óréttlætisins sem það stendur frammi fyrir ásamt hjálpar- og varnaleysinu sem það upplifir þegar heimilinu er hreinlega stolið af því, er ekki nema von að eitthvað láti undan.

Spillingin í þjóðfélaginu er djúp og hún á sér margar hliðar. Hún birtist ekki bara í háu húsnæðisverði og skelfilegum leigumarkaði eða háum vöxtum og verðtryggingu, hún birtist ekki bara í því hvernig lífeyrissjóðirnir misfara með fé okkar allra eða í „krónu á móti krónu“ skerðingu, hún birtist ekki bara í lágum launum verkafólks á meðan sjálftökufólk af ýmsum toga skammtar sjálfu sér milljónir, hún birtist ekki bara í spilltum dómstólum sem gæta hagsmuna „hinna sterku“ í dómum sínum eða í því hvernig lög- og stjórnaskrárvarin réttindi hafa verið brotin á neytendum frá hruni með skelfilegum afleiðingum.

Nei, hún birtist í þessu öllu og meiru til. Spillingin er djúp og teygir anga sína víða. Hana þarf að rífa upp með rótum til að hægt sé að byggja upp nýtt og betra þjóðfélag.

Fyrsta skrefið væri að að afnema verðtryggingu á lánum heimilanna! Öðruvísi er ekki hægt að skapa eðlilegan húsnæðismarkað eða stöðva sjálftöku fjármálastofnanna á tekjum fólks.

En til að takast á við ræturnar þarf að fara fram rannsókn á aðgerðum stjórnvalda eftir hrun. Jú það var líka spilling fyrir hrun, en þá urðu ákveðin vatnaskil og það var þá sem meðvituð ákvörðun var tekin um að fórna heimilum landsins fyrir bankana.

15.000 heimili eiga skilið að fá svör og uppreist æru.

Við biðjum ykkur um að styðja kröfuna um Rannsóknarskýrslu heimilanna!

Ásthildur Lóa Þórsdóttir
Formaður HH

Fylgstu með á samfélagsmiðlum